चंद्रपूर शहरालगत असलेल्या शिवणी चोर गावात काही दिवसांपासून अवैध रेती तस्करी सुरू असल्याच्या तक्रारी तहसील विभागाला वारंवार प्राप्त होत होत्या. गावातील आणि परिसरातील नागरिकांनी तक्रारी करताच तहसील प्रशासनाने तात्काळ पावले उचलली.
प्रशासनाने रेती वाहतुकीसाठी वापरल्या जाणाऱ्या मुख्य मार्गांवर मोठे खड्डे खोदून वाहतुकीला अडथळा निर्माण केला, त्यामुळे तस्करांचे हाल झाले. मात्र काही तस्करांनी दुसऱ्या मार्गाचा वापर करून पुन्हा रेती तस्करी करण्याचा प्रयत्न केला. तहसील प्रशासनाने याची दखल घेत तात्काळ पथके तैनात केली आणि रेती तस्करी रोखण्यासाठी अधिक कठोर उपाययोजना केल्या.प्रशासनाच्या सतर्कतेमुळे तस्करांचा डाव फसला. वेळेवर केलेल्या कारवाईमुळे सध्या गावात कुठल्याही प्रकारची रेती तस्करी होत नसून, गावात शांतता आणि नियमबद्धता निर्माण झाली आहे. गावकऱ्यांनी तहसील प्रशासनाच्या कार्यक्षमतेचे कौतुक करत त्यांचे आभार मानले आहेत.तहसील विभागाने जाहीर केले आहे की, भविष्यातही कोणतीही बेकायदेशीर रेती तस्करी होणार नाही यासाठी नियमित गस्त व निगराणी ठेवली जाईल. यामुळे शिवणी चोर गाव आणि आसपासच्या परिसरात अवैध रेती उपशावर प्रभावी नियंत्रण आणले गेले आहे.
